Usa ka insidente sa pagbanlas sa yuta sa Salinas Drive sa Barangay Lahug, Dakbayan sa Sugbo ang nakaaghat sa Cebu City Disaster Risk Reduction and Management Office (CCDRRMO) ug Cebu City Transportation Office (CCTO) sa pagresponde sa emerhensya kagahapong adlawa Biyernes, Agosto 7, 2026.
Ang mga rescue personnel dali nga nagsiguro sa lugar gamit ang mga safety cordons ug mga warning device aron malikayan ang mga aksidente nga naglambigit sa mga motorista ug mga pedestrian.
Base sa inisyal nga imbestigasyon, nagpakita nga ang usa ka nagtulo o nadaot nga pipeline sa JE Hydro nga konektado sa Metropolitan Cebu Water District (MCWD) mahimong hinungdan sa pagbanlas sa ilawom nga bahin sa kadalanan, nga miresulta sa pahulpa sa yuta. .
Giklaro sa CCDRRMC Head ug Konsehal Dave Tumulak nga dili kini usa ka sinkhole diin nakubkob lang kini tungod sa preasure sa tubig hinungdan sa pagkahulpa niini.
Gipagawas sa MCWD ang pinakabag-o nga advisory niini, nga nagpasidaan nga daghang mga barangay sa Dakbayan sa Sugbo ang mahimong makasinati og ubos nga pressure sa tubig hangtod sa walay suplay sa tubig tungod sa pagkabalda sa serbisyo.
Ang mga apektadong lugar naglakip sa tibuok dapit sa Busay, Nivel Hills, PBN, Plazaville, Maracas, Lahug, Gorordo,Escario, Capitol Site, Jones Area, Camagong, Ramos, Sambag 1 & 2, Calamba, V. Rama, Labangon, B. Rodriguez, Banawa, Jakosalem, San Antonio, Echavez Street, Ayala, Hipodromo, Camputhaw, Archbishop Avenue, Cebu City.
