Gipadayag ni House prosecutor ug Bukidnon 2nd District Representative Keith Flores nga nagpadayon gihapon sa iyang mga kalihokan si Vice President Sara Duterte bisan pa sa kawalan og confidential funds, hinungdan nga gikuwestiyon kini niya bahin sa panginahanglan sa paggasto og minilyon ka pesos gikan sa maong pondo alang sa susamang mga kalihokan.
Gipagawas ni Flores ang obserbasyon isip reaksyon sa testimonya sa state auditor sa Commission on Audit (COA) nga si Xylene Del Campo kabahin sa paggamit sa confidential funds sa Office of the Vice President (OVP).
Sa sayo pa, si Del Campo nagpresentar og mga dokumento nga nagpakita sa nagkalain-laing mga kalihokan nga giorganisar sa OVP aron ipasabot ang paggamit sa kompidensyal nga pondo, lakip na ang pagpananom og kahoy, Christmas parties, ug uban pang mga kalihokan nga may kalabotan sa komunidad.
Gibutyag ni Flores sa usa sa mga press conference nga ang Bise Presidente nakahimo gihapon sa samang mga kalihokan karon bisan pa kon walay confidential funds. Matod niya nga malampuson ug luwas gihapon ang maong mga kalihokan, busa nganong kinahanglan pa man siyang mogasto og daghang kwarta sa mga butang nga iyang gibuhat kada adlaw karon nga wala na silay maong mga pundo.
Para kang Flores, kining pagtandi nagpatunghag usa ka sukaranang pangutana: kon ang maong mga kalihokan luwas nga mahimo karon nga walay kompidensyal nga pundo, nganong minilyon ka pesos pa man ang gikinahanglan alang niini?
Samtang sumala usab ni prosecution spokesperson Rep. Zia Alonto Adiong , iyang gikuwestiyon usab ang panginahanglan sa OVP nga mogasto og kompidensyal nga pondo para sa mga kalihokan nga mahimong matabonan sa regular nga mga operasyon sa seguridad sa gobyerno.
Gipasabot ni Adiong nga ang mga ahensya nga adunay direktang mandato sa seguridad adunay na mga tawo ug mga kahinguhaan alang sa regular nga trabaho sa pulisya ug seguridad. Sumala niya, ang OVP kinahanglan lamang nga mokomplemento ug dili mokopya sa ingon nga mga paningkamot.
Dugang ni Adiong nga ang regular nga mga kalihokan sa mga ahensya sa seguridad dili angay nga usbon nga walay pagtagad. Naghatag siya og ehemplo sa seguridad alang sa mga pagpakita sa Bise Presidente sa publiko, nga iyang giingon nga mahimo ra dumalahon sa regular nga trabaho sa pulisya ug dili kinahanglan nga mogasto og minilyon alang niini.
Gipresentar sa prosekusyon ang testimonya sa COA isip kabahin sa ilang kaso sa impeachment trial ni Duterte kabahin sa giingong sayop nga paggamit sa confidential funds sa OVP ug sa Department of Education.
