Gipasabot ni Atty. Rameses Victorius Gatchalian Villagonzalo, usa ka ICC-accredited lawyer, ang iyang mga obserbasyon bahin sa gipahigayon nga impeachment trial batok sa Bise Presidente.
Sumala niya, si OVP Asec. Lemuel Ortonio kay matawag nga usa ka “intelligent witness” tungod sa maayo ug mabugnaw nga pagtubag sa mga pangutana atol sa cross, direct, ug redirect examination.
Gipahayag ni Atty. Villagonzalo nga pinaagi sa mga aksyon ug tubag ni Ortonio, malampuson niyang napalayo ang iyang kaugalingon gikan sa bisan unsang sibil o kriminal nga responsibilidad ug tulubagon, ug gikuwestiyon usab niya ang pagbalhin sa maong responsibilidad ngadto kang Gina Acosta ug Colonel Lachica.
Bisan pa sa gihimong pagdepensa ug alegasyon nga ang paggamit sa maong pondo kay ginahimo sa regular nga paagi para sa confidential funds, nagpabilin ang usa ka crucial nga admisyon diin nasayran nga si Colonel Lachica kay dili usa ka opisyal o empleyado sa Office of the Vice President (OVP).
Sumala sa iyang gipasabot, si Colonel Lachica kay sakop sa Armed Forces of the Philippines (AFP) nga gi-detail lamang aron magsilbing bahin sa security detail.
Tungod niini, naghatag kini ug dakong kalibog ug kontradiksyon kon ngano nga usa ka tawo nga dili opisyal ug walay direktang kalabutan sa OVP ang gihatagan ug katungod o pondo para sa confidential activities sa opisina.
Sama sa dugang nga gipasabot ni Atty. Villagonzalo, dako kaayo ang importansya nga ipatawag si Colonel Lachica sa impeachment trial bisan pa man og usa ka hostile witness.
Sumala niya, responsibilidad sa prosekusyon ang pag-establisar ug pagpamatuod sa mga alegasyon batok sa respondent subay sa Articles of Impeachment. Busa, ang pagtawag kang Colonel Lachica usa ka kinahanglanon ug importante nga estratehiya tungod kay napamatud-an gikan sa nangaging mga testimonya nga siya gisaligan sa kwarta o pundo, nga naghimo kaniya nga usa ka importante nga bahin sa puzzle o kinatibuk-ang kaso.
Bisan wala pa gipa-subpoena sa prosekusyon si Colonel Lachica, gitinop ni Atty. Villagonzalo nga kinahanglan siyang ipatawag bisan pa kon siya usa ka ostile witness aron husto nga mahiusa ug makonektar ang tanang ebidensya batok sa akusado.
