CEBU CITY- Gipahibalo ni Cebu City Councilor Joel Garganera nga maghimo og inspection ang City Council uban sa mga concerned offices sa siyudad sa mga landfill facilities nga mahimong sudlan sa basura sa Cebu City.
Kini human nga fully lifted na ang cease and desist order batok sa Binaliw Landfill, nga usa sa mga pasilidad nga gikonsiderar sa siyudad alang sa garbage disposal.
Matud ni Garganera, adunay resolution nga gipasa ang City Council diin ang tanang kompanya nga moapil sa bidding ug kwalipikado nga modawat sa basura sa siyudad pagasusi-on una.
Apil sa mo-inspection ang Office of the Building Official o OBO, structural engineers, environmental personnel, City Disaster Risk Reduction and Management Office, City Health Office, Cebu City Environment and Natural Resources Office o CENRO, ug Department of Public Services o DPS.
Sumala sa konsehal, importante ang maong proseso aron masiguro nga luwas ug angay ang landfill nga pagadalhan sa basura sa siyudad, ilabina kay mokabat sa kapin 600 ka tonelada ang garbage output sa Cebu City matag adlaw.
Gipasiugda ni Garganera nga dili lamang ang gasto ug gilay-on ang angay ikonsiderar sa pagpili sa landfill, kondili labi na ang safety sa mga molihok ug manghipos sa basura, ingon man ang epekto niini sa mga komunidad nga mahimong maapektuhan.
Matud pa niya, scheduled sa September 2, 2026, alas-1 sa hapon ang inspection sa Prime Waste facility, isip kabahin sa qualification process sa mga mahimong garbage disposal service provider sa siyudad.
Gipasabot usab ni Garganera nga ang bidding usa ka requirement sa government procurement process ug ang mga bidder pagasusihon base sa Terms of Reference nga gitakda sa siyudad.
Samtang, bisan pa man sa pag-libkas sa cease and desist order sa Binaliw Landfill, giingon ni Garganera nga magpadayon gihapon ang remediation o rehabilitation sa maong pasilidad base sa kondisyon sa order.
Gipahayag usab sa konsehal nga ang kapasidad sa Binaliw Landfill nga makadawat og basura limitado lamang sa 500 ka tonelada matag adlaw, samtang ang garbage output sa Cebu City mokabat sa kapin 600 ka tonelada kada adlaw.
Tungod niini, gikinahanglan usab sa siyudad ang pagpadayon sa mga lakang alang sa waste reduction, recycling ug uban pang pamaagi aron maminusan ang basura nga kinahanglan dad-on sa landfill.
Gibug-atan ni Garganera nga ang tumong sa siyudad mao ang pagpili og garbage disposal facility nga dili lamang barato apan, labaw sa tanan, luwas alang sa mga tawo ug sa palibot.
