Giingong migasto og P473,000 kada oras sa confidential funds si Vice President Sara Duterte sa katapusang 11 ka adlaw sa Disyembre 2022, sumala sa tigpamaba sa House prosecution panel ug Lanao del Sur Rep. Zia Alonto Adiong.
Nadawat sa Office of the Vice President (OVP) ang P125 milyon nga confidential fund nga ilang gipangayo niadtong Disyembre 20, 2022. Basi sa mga dokumento nga gisumite sa OVP ngadto sa Commission on Audit (COA), ang pundo gigasto gikan Disyembre 21 hangtod 31, 2022.
Gawas sa extra-ordinary spending, si Alonto Adiong miingon nga gikuwestiyon usab sa prosekusyon ang pagpasabot sa OVP nga ang pundo obligado sa dili pa kini ipagawas sa opisina, nga giingong supak sa Joint Circular 2015-001, diin ang mga giya sa paggamit sa confidential ug intelligence funds.
Gikuwestiyon usab sa prosekusyon kon giunsa nga ang OVP special disbursing officer nga awtorisado sa pagpagawas sa pundo nakahimo sa pagbiyahe ngadto sa daghang mga lokasyon sa usa ka adlaw.
Ang 11 ka adlaw nga paggasto, sumala ni Alonto Adiong, usa ka importanteng isyu sa Impeachment Article I, diin si Duterte giakusahan sa culpable violation sa Konstitusyon, graft and corruption, ug betrayal of public trust nga may kalabotan sa giingong sayop nga paggamit ug iregularidad sa paggamit sa P612.5 milyon nga confidential funds.
