Niabot na sa pipila ka bahin sa Kabisay-an ang haze sa Indonesia o gitawag nga transboundary pollutants tungod sa kaylap nga sunog sa kalasangan sa Kalimantan, Indonesia.
Sa pagpasabot ni Air-Quality Specialist sa EMB Region 7 Engr. Arthur Niño Callupig, nga ang transboundary pollutants mga pollutant sa hangin nga adunay abilidad sa pagbiyahe o pagbalhin gikan sa usa ka nasud ngadto sa laing lugar.
Sumala sa datos sa pagmonitor sa kalidad sa hangin, ang AQI nga 101 hangtod 150 giklasipikar nga “Unhealthy for Sensitive Groups, diin ang mga sensitibo nga grupo mahimong makasinati og mga epekto sa panglawas kung ma-expose sa hugaw nga hangin sa dugay nga panahon.
Tungod sa gilay-on sa gigikanan niini, ang mga pollutant nga nakaabot sa lugar gilangkoban sa mga gaseous pollutant ug gagmay nga mga particulate sama sa abog ug abo. Ingon man, ang labing gikabalak-an niini mao ang mas pino nga mga particulate nga nailhan nga PM 2.5.
Tungod sa padayon nga pagtaas sa lebel sa PM 2.5 sa hekto-hektaryong nga monitoring area, ang kalidad sa hangin natala sa lebel nga “very unhealthy” alang sa publiko.
Busa, giawhag ang mga residente sa Dakbayan sa Sugbo ug sa mga kasikbit nga lugar nga magpabiling mabinantayon, mag-amping sa paggawas, ug magpadayon sa pagmonitor pinaagi sa mga opisyal nga abiso gikan sa DENR-EMB, PAGASA, ug uban pang may kalabutan nga mga ahensya sa gobyerno.
Lakip usab sa mga precaution nga gihimo, ang mga Cebuano gitambagan nga magsul-ob og face mask kung mogawas, labi na sa mga lugar nga makita ang haze, ug limitahan ang dugay nga mga kalihokan sa gawas.
