Gipanalipdan sa kampo ni Bise Presidente Sara Duterte niadtong Martes ang paggamit sa Department of Education (DepEd) og mga attendance certification gikan sa Philippine Army aron ipasabot ang paggasto sa milyun-milyong confidential funds, bisan pa sa pamahayag sa mga opisyal sa militar nga wala sila mahibalo sa maong katuyoan.
Sa ika-20 ka adlaw sa impeachment trial batok kang Duterte, gipadayag ni Col. Manaros Boransing II sa 1st Infantry Division ug Col. Magtanggol Panopio sa 7th Infantry Division nga nagpagawas ra sila og certificates of attendance alang sa pag-apil sa DepEd sa Youth Leadership Summits (YLS) ug Information Education Campaigns (IEC) niadtong 2023.
Nakalitan ang duha ka opisyal sa dihang gigamit sa DepEd ang maong mga dokumento aron i-liquidate ang P15.54 million nga confidential funds nga kuno gigasto isip ganti o reward sa maong mga okasyon, tungod kay ang pondo sa YLS ug IEC naggikan man sa budget sa Armed Forces of the Philippines (AFP) ug mga lokal nga kagamhanan.
Gihatagan og katarungan ni Lead Defense Counsel Shiela Sison nga gipagawas sa AFP officers ang mga sertipikasyon matag panid uban ang nakasulat nga “for whatever legal purpose it may serve,” hinungdan nga magamit kini sa bisan unsang legal nga katuyoan.
Gipasiugda ni Sison nga aduna silay mga opisyal nga sertipikasyon gikan sa militar nga nagpamatuod sa lehitimong kolaborasyon tali sa Department of Education (DepEd) ug sa Armed Forces of the Philippines (AFP) batok sa terorismo.
Miingon siya nga samtang andam sila nga mouyon sa kondisyon nga walay pondo nga direktang ibalhin sa ubang ahensya (agency-to-agency), dili gyud nila isalikway ang baruganan nga adunay aktuwal nga pagpaambit sa impormasyon sa paniktik atol sa termino ni Bise Presidente Sara Duterte isip Kalihim sa Department of Education (DepEd).
Wala na gipangutana sa defense panel ang duha ka opisyal sa militar, apan gipatin-aw sa defense deputy spokesperson nga si Atty. Justin Gular nga wala sila’y pagduhaduha sa kredibilidad sa mga saksi.
Samtang gipangandaman usab sa impeachment court ang pagtestigo ni Atty. Michael Poa, ang kanhi undersecretary sa DepEd ug nag-unang tagpamaba sa defense panel, isip sunod nga hostile witness sa prosecution karong adlawa, Setyembre 2.
