Gipadayag ni Cebu Provincial Board Member Celestino “Tining” Martinez III ang iyang kabalaka ug kasubo bahin sa Cebu Probinsya nga padayong gihasol sa kanunay nga pag-brown out o rotational power outages.
Taliwala sa mga gihisgutang balaodnon ug ordinansa bahin sa pagbutang og mga electric vehicle charging stations, naghimo og lakang si BM Martinez pinaagi sa pagdapit ug pagpatawag sa mga nag-unang service providers sama sa CEBECO ug VECO sa mosunod nga session sa Sangguniang Panlalawigan.
Sumala pa ni Martinez, kinahanglan nga mahatagan og katinawan ug tubag sa mga distribution utilities kon ngano nga kanunay nahitabo ang mga brown out sa nagkalainlaing dapit ug kon hangtod kanus-a pa molahutay ang maong problema sa kuryente.
Giingong gituyo usab kini aron matun-an ug mapaambit sa publiko kon unsa ang mga konkreto nga solusyon nga himoon aron dili na magpadayon ang perwisyo sa kuryente alang sa mga residente ug negosyo sa probinsya.
