Naglunsad ang Ukraine sa pinakadakong drone attack niini batok sa Moscow Region, diin naigo ang ‘major’ nga ‘oil refinery’ ug usa ka ‘residential building’.
Matud kang Moscow Mayor Sergei Sobyanin, 450 ka drones nga paingon sa kapital ang gitira sa Russian air defense, samtang labing menos duha ka tawo ang namatay ug 20 ang nasamdan.
Gikumpirmar usab ni Ukrainian President Volodymyr Zelensky nga naigo sa ilang drones ug missiles ang usa ka importanteng pasilidad sa lana ug ‘logistics site’ sa Russia, nga giingong nagsuplay og krudo alang sa rehiyon sa Moscow ug sa militar sa Russia.
Usa ka 44-anyos nga babaye ang namatay human maigo sa drone ang tulo ka andana nga residential building sa Sofyino, samtang lima pa ang nasamdan, lakip ang duha ka bata.
Namatay usab ang usa ka tigulang nga lalaki human maigo sa drone ang usa ka pribadong balay sa Orekhovo-Zuevo district.
Samtang, siyam ka tawo, lakip ang tulo ka bata, ang gikatahong namatay sa mga pag-atake sa Russia sa Kyiv ug Sumy regions sa Ukraine niadtong Sabado.
Nagpadayon ang pagkagrabe sa drone ug missile attacks sa Russia ug Ukraine batok sa mga pasilidad sa enerhiya, transportasyon ug logistics, bisan pa sa pag-angkon ni US President Donald Trump nga nagkauyon ang duha ka nasod nga dili atakehon ang energy infrastructure.
