Gikondenar ni Ukrainian President Volodymyr Zelensky ang pagpanghilabot sa North Korea sa gubat sa Russia tungod sa paggamit sa mga sundalo isip “currency” o bayad.
Sa usa ka pahayag, gipasabot ni Zelensky ang kalambigitan sa North Korea sa gubat batok sa Ukraine, diin matud niini nga gigamit ni Kim Jong Un ang iyang mga sundalo isip “bayad” aron makakuha og gikinahanglang tabang ug teknolohiya.
Nagpatungha kini og mga kabalaka sa nagkadaiyang mga rehiyon ug nasod sa Asya bahin sa nakitang pag-uswag sa teknolohiya sa North Korea lakip na ang mga ballistic missile ug modernong kapabilidad sa drone nga nagpakita sa ilang pagpangandam alang sa gubat.
Gihisgotan usab niya ang rason kon nganong kinahanglan pang ihalad sa mga Koreano ang ilang kinabuhi sa usa ka gubat nga dili ila.
