Magpabilin sa Pilipinas ang usa sa mga nag Top 5 sa 2026 Psychometricians Licensure Examination aron makatabang sa mga serbisyo sa mental health dinhi sa Pilipinas.
Kini ang gipaambit ni Leichlen Urboda Baylon, usa sa mga nakasulod sa Top 5 sa 2026 Psychometricians Licensure Examination, atol sa pakighinabi sa Bombo Newsteam.
Gikanayon ni Baylon nga tungod nagkakadaghan ang kaso sa mga mental health karong panahona, mas gipili niini nga magpabilin sa nasud aron motabang sa pagtukod ug pagpalambo sa kahibalo ug mga serbisyo bahin sa mental health.
Gihimug-atan usab ni Baylon ang dakong kakulang sa mga propesyonal sa psychology ug mga guidance counselor aron matubag ang nagkataas nga kaso sa mental health. Busa, nipadayag usab kini sa iyang garbo ug kalipay nga daghan sa iyang mga kaubang propesyonal ang nakapasar sa eksaminasyon uban ang determinasyon nga palig-onon ug pauswagon ang mga serbisyo sa mental health sa tibuok nasud.
Subay niini, nipadayag si Baylon sa iyang paglaom nga mamugna ang mga opisyal nga posisyon sa gobyerno alang sa mga psychometrician, gumikan sa pagkakaron, walay natukod nga mga posisyon nga espesipiko alang sa mga psychometrician sulod sa sektor sa gobyerno.
Apan, nagpaabot siya sa pag-abli sa posisyon nga “School Counselor Associate,” nga magtugot sa mga gradwado sa psychology nga makatrabaho ug makahatag og tabang sa mga eskwelahan.
Dugang usab niini nga ang naasoy nga lakang makatabang sa paghatag og igong suporta ug serbisyo sa mental health, ingon man sa pagpanalipod sa kaayohan sa publiko, ilabi na sa mga estudyante.
