Matod sa Malacañang, ang testimonya ni Davao City Mayor Baste Duterte sa impeachment trial mahimong magtakda og delikadong sumbanan alang sa mga lokal nga opisyal, tungod kay ang mga lider dili basta-basta makagamit sa rason nga wala sila masayod sa mga butang nga nahitabo sulod sa ilang hurisdiksyon.
Niadtong Martes, nagpamatuod si Duterte nga wala siya masayod nga ang iyang igsoon nga si Vice President Sara Duterte adunay interes sa negosyo sa GenCorp Industries Inc., ug midugang nga dili unta niya tugotan ang gobyerno sa siyudad nga mohatag og mga kontrata sa maong kompanya kung nasayod pa siya niini.
Matod ni Palace Press Officer Claire Castro atol sa usa ka press briefing niadtong Miyerkules, Septiyembre 30, ang binuhatan sa mayor delikado tungod kay mamahimo kining gamiton usab kini sa ubang mga mayor aron moingon nga wala sila masayod nga igsoon diay niini ang ka-transact.
Nangatarungan usab kini nga ang Arias Doctrine, nga gihisgutan ni Senator-judge Panfilo Lacson atol sa husay, dili kanunay magamit nga depensa, diin kini nag-ingon nga ang mga pangulo sa opisina mahimong mosalig sa makatarunganong ang-ang sa ilang mga sakop ug sa maayong intensyon niadtong mga nag-andam sa mga bid, namalit og mga suplay, o nakig-negosasyon.
Matod ni Castro, ang testimonya ni Mayor Duterte sa impeachment court sa Senado nagpakita lamang nga wala siya masayod sa mga detalye sa mga transaksyon uban sa GenCorp ug wala usab siya maningkamot nga masayran kini.
Hinuon, matod niya nga ang mayor, sa usa ka paagi, naglambigit kang Vice President Duterte pinaagi sa pag-ingon nga dili unta siya makig-transaksyon sa maong kompanya kung nasayod pa siya nga konektado niini ang iyang igsoon.
Gipasabot ni Castro nga wala siya naghimo og paghukom ug nagkomento lamang sa mga gisulti ni Mayor Duterte sa korte.
Gipahinumdoman ni Castro ang mga lokal nga lider nga magmabinantayon sa pag-apruba sa mga transaksyon, ug miingon nga dili sila basta-basta makagamit sa Arias Doctrine isip panalipod sa ilang kaugalingon.
Sa dihang gipangutana kung madawat ba nga walay kasayuran si Mayor Duterte bahin sa mga negosyo nga nakig-transaksyon sa city hall, si Castro miingon nga ang publiko na ang angay mohukom niini.
Sa dihang gipangutana kung giisip ba sa Palasyo nga gikinahanglan ang pag-imbestigar sa koneksyon sa pamilyang Duterte kang Jaime Tan Cruz, si Castro miingon nga mas maayo nga susihon ang posibleng kalambigitan sa kanhi special envoy.
Hinuon, miingon usab siya nga ang mga imbestigasyon batok sa mga pribadong indibidwal nga nalambigit sa giingong korapsyon angay nga ipadayon. Si Cruz, kansang ngalan migawas sa mga dokumento sa pipila ka mga negosyo nga nalambigit sa bise presidente, mao usab ang espesyal nga sinugo alang sa pamatigayon ug pamuhunan sa China nga gitudlo niadtong 2019 ni kanhi Presidente Rodrigo Duterte.
