Gisaway ug gipadayag ni Rear Admiral Jay Tarriela, ang tigpamaba sa Philippine Coast Guard (PCG) for the West Philippine Sea, ang iyang kasuko batok sa gobyerno sa China tungod sa giingong “barbaric behavior” niini.
Matod ni Tarriela, walay pagpakabana ang China sa kinabuhi, pisikal nga kaluwasan, ug kaayohan sa mga Pilipino nga nadestino sa BRP Sierra Madre.
Gipunting niya nga ang gobyerno sa China nagpalig-on ug nagpadayon lang sa pag-insistir sa ilang ilegal nga mga pag-angkon ug “imperyalistang baruganan” sa South China Sea.
Gihatagan usab og gibug-aton ni Tarriela nga ang paghatag og tabang—ilabi na kalabot sa panglawas ug kaluwasan sa mga tawo, usa ka moral nga obligasyon nga labaw pa sa politika o mga pag-angkon sa teritoryo.
Gipasabot niya nga kung hisgutan na ang pisikal nga kaluwasan ug seguridad sa mga sundalong Pilipino o sa mga lungsoranon sa nasod, kinahanglan nga magkahiusa ang tanan aron masiguro ang ilang kaayohan.
