Gipalig-on sa Department of Education (DepEd) ug Commission on Higher Education (CHED) ang suporta alang sa mental health sa mga estudyante pinaagi sa scholarship grants alang sa mga guidance counselor ug guidance associate sa tibuok nasud.
Gihimo kini nga lakang subay sa mga bag-ohay nga insidente sa kapintasan sulod sa mga eskwelahan.
Matod ni Education Secretary Sonny Angara, lakip sa mga programa ang LINGAP o Learning Initiatives for Nurturing Guidance Associates and Counselors sa CHED.
Ubos sa maong programa, gibana-banang 800 ka scholarship grants ang gigahin alang sa mga guidance counselor ug guidance associate, diin kapin sa 200 ka mga scholar ang naka-enroll na.
Nanawagan si Angara sa tibuok komunidad, ilabi na sa mga ginikanan, nga aktibong moapil sa paggiya sa mga bata ug pagpanalipod kanila batok sa makadaot nga mga impluwensya, lakip na sa ilang mga kalihokan online.
