CEBU CITY- Naghatag og modular tents ang Department of Social Welfare and Development (DSWD)-7 sa mga pamilyang gibakwit human sa landslide sa Barangay Pulangbato, dakbayan sa Sugbo.
Personal nga mibisita si DSWD-7 Director Shalaine S. Lucero sa 25 ka pamilya nga temporaryong nagpuyo sa evacuation center ug nakadawat og modular tents.
Nagpadayon ang monitoring sa ahensya aron matino ang dugang nga panginahanglan sa mga apektadong residente ug maseguro nga mahatagan sila sa angay nga ayuda.
Nakigtambayayong usab ang DSWD-7 sa Cebu City Government alang sa paghatag og pagkaon ug uban pang kinahanglanon sa mga evacuee.
Gimonitor usab sa ahensya ang kahimtang sa mga pamilyang namatyan ug sa usa ka indibidwal nga nasamdan sa insidente aron matino ang angay nga tabang, lakip ang posibleng pinansyal nga asistencia ug tabang sa galastohan sa lubong.
Gipasalig ni Lucero nga magpadayon ang DSWD-7 sa paghatag og suporta sa mga apektadong pamilya, ilabi na sa mga panginahanglan nga dili hingpit nga matubag sa lokal nga kagamhanan.
Samtang, nagpadayon ang koordinasyon tali sa DSWD-7 ug Cebu City Government aron maseguro nga mahatagan og tukmang asistencia ang tanang evacuee.
