Gipahibalo ni Pope Leo XIV nga ipailalom siya sa operasyon sa umaabot nga mga adlaw aron tangtangon ang usa ka nodule o gamay nga bukol gikan sa usa sa iyang mga baga, nga bag-o lang nakit-an atol sa mga medical examinations.
Namulong ngadto sa mga tumutuo nga nagkatigom sa St. Peter’s Square human sa pag-ampo sa Angelus niadtong Oktubre 11, personal nga gipadayag sa Santo Papa ang iyang kahimtang sa panglawas, ug mipasabot nga ang bukol nakit-an sa sayo nga yugto.
Girekomendar sa iyang mga doktor ang operasyon aron tangtangon ang nodule ug nakahukom siya nga mosunod sa ilang tambag.
Gikumpirma usab sa Papa nga naka-iskedyul na ang operasyon ug ipahigayon kini sa umaabot nga mga adlaw, ingon man nag wala siya naghatag og dugang mga detalye bahin sa eksaktong petsa o sa pamaagi sa operasyon.
Matud ni Matteo Bruni, director sa Holy See Press Office, nga gilaumang magpabilin sa ospital ang Santo Papa sulod sa gibana-bana nga usa ka semana sa Gemelli Hospital sa Roma, diin ipadayon niya ang iyang pagkaayo human sa operasyon.
Ang Presidente sa U.S. Conference of Catholic Bishops, si Archbishop Paul S. Coakley, nagtanyag ug nangayo og mga pag-ampo alang sa Santo Papa pinaagi sa usa ka pahayag: “Karong buntaga, gipahibalo sa Santo Papa nga ipailalom siya sa operasyon alang sa usa ka lung nodule (bukol sa baga) sa umaabot nga mga adlaw. Ang mga obispo sa Estados Unidos nakig-uban sa mga magtutuo ug sa tanang tawo nga adunay maayong kabubut-on sa pag-ampo alang sa iyang maayong panglawas. Hinaot nga ang mga kamot sa mga siruhano ni Papa Leo giyahan sa balaang mananambal nga si Jesu-Kristo. Palihog paggahin og kadiyot karong adlawa, sama sa akong buhaton, aron paghalad og pag-ampo alang kang Papa Leo ug sa iyang care team.”
Tungod sa iyang pagpa-ospital, kinahanglan nga kanselahon sa Santo Papa ang tanang mga kalihokan nga gikatakda alang sa umaabot nga mga adlaw.
