CENTRAL VISAYAS- Gikuwestiyon sa BAYAN Central Visayas ang ₱42 nga dugang sa minimum wage nga gipatuman karong Oktubre 14, tungod sa padayon nga pagsaka sa presyo sa mga batakang panginahanglanon.
Matod ni Jaime Paglinawan, chairperson sa BAYAN Central Visayas, dili igo ang maong wage increase aron matabangan ang mga mamumuo sa pag-atubang sa nagkataas nga gasto sa panginabuhi.
Ubos sa bag-ong wage order, mokabat sa ₱582 ang minimum nga inadlaw nga sweldo sa Metro Cebu, samtang ₱540 sa Bohol, Negros ug Siquijor, sumala sa iyang gipahayag.
May kalabotan niini, magpahigayon og kalihukan ang grupo karong hapon sa opisina sa Regional Tripartite Wages and Productivity Board (RTWPB) sulod sa Department of Labor and Employment (DOLE) Region 7 aron ipahayag ang ilang pagsupak sa giisip nilang kulang nga dugang sa sweldo.
Matod ni Paglinawan, padayon ang pagsaka sa presyo sa bugas, pagkaon, kuryente ug tubig, busa dili igo ang ₱42 nga dugang aron matubag ang adlaw-adlaw nga panginahanglan sa mga mamumuo.
Gikutlo usab niya ang inflation rate nga, matod niya, miabot sa 9.4 porsiyento sa Cebu Province ug 8.4 porsiyento sa Cebu City.
Tungod niini, gipadayon sa grupo ang panawagan alang sa ₱1,200 nga minimum nga inadlaw nga sweldo, nga ilang giisip nga mas makatubag sa panginahanglan sa mga mamumuo ug sa ilang mga pamilya.
Gikumpara usab ni Paglinawan ang minimum wage sa Central Visayas sa National Capital Region (NCR), diin, matod niya, miabot na sa ₱755 kada adlaw ang minimum wage.
Gipasiugda niya nga kinahanglan ikonsiderar sa gobyerno ug sa wage board ang aktuwal nga gasto sa panginabuhi, lakip ang pagkaon, bayranan sa balay ug edukasyon sa mga anak.
