Nanawagan si Senador Jinggoy Estrada nga gamiton ang diplomasya ug tahoron ang paghari sa balaod taliwala sa mga panawagan nga ideklarar nga persona non grata si Chinese Ambassador Jing Quan.
Kini human sa gikataho nga pahayag sa embahador nga dali rang makadaog ang Beijing kon mogamit kini og puwersa kalabot sa panagbangi sa West Philippine Sea (WPS).
Bisan pa sa kasagmuyo ug kabalaka sa publiko tungod sa maong pahayag, miingon si Estrada nga kinahanglan ipadayag sa Pilipinas ang lig-on nga pagsupak niini, apan dili angay sirad-an ang pultahan alang sa dayalogo.
Gipasiugda sa senador nga ang pagdeklara sa usa ka diplomat nga persona non grata dili angay buhaton nga dinalian o walay igong pagtimbang-timbang sa posibleng mga sangputanan niini.
Matod ni Estrada, mas mapakita sa Pilipinas ang kalig-on sa baruganan niini pinaagi sa makanunayong pagpatuman sa balaod, pagpanalipod sa kamatuoran, ug pagbarog alang sa nasodnong interes, imbes nga magsalig lamang sa mapintas nga mga pahayag.
Gipahinumdoman usab niya ang China sa pagrespeto sa 2016 Arbitral Award, nga maoy usa sa mga importanteng basihan sa baruganan sa Pilipinas bahin sa West Philippine Sea.
