Gikondenar ni Cebu City Mayor Nestor Archival ang pagpatay sa 24-anyos nga si Isaac Virgel Viernes, kansang patayng lawas nakaplagan sa usa ka bakanteng luna sa Citilink, Barangay Pahina Central, Siyudad sa Sugbo, niadtong Lunes sa hapon, Oktubre 19.
Sa pagpakig hinabi sa Bombo Radyo Cebu, gipaabot ni Archival ang iyang pahasubo ngadto sa pamilya ni Viernes ug nanawagan sa Cebu City Police Office (CCPO) nga padalion ang imbestigasyon ug sigurohon nga ang mga responsable niini atubangon sa balaod.
Gidayeg usab sa mayor ang Cebu City Disaster Risk Reduction and Management Office (CCDRRMO) ug ang mga personahe nga mitubag sa insidente tungod sa ilang tabang. Giawhag niya ang publiko nga mohatag og bisan unsang may kalabotan nga impormasyon ngadto sa mga awtoridad, samtang nagtahod usab sa pribasiya sa pamilya.
Si Viernes gikatahong nawala sulod sa gibana-banang duha ka semana una pa nakaplagan ang iyang patayng lawas.
Nagpadayon ang imbestigasyon sa kapulisan, diin gisusi nila ang mga CCTV footage ug nangandam sa pagkuha og pamahayag gikan sa mga tawo nga giisip nga may kalabotan sa kaso.
