Gipahinumdoman sa LTFRB-7 ang mga operator sa public utility vehicles o PUVs sa pagsiguro nga adunay mga safety equipment sama sa CCTV, dashcam ug GPS ang ilang mga sakyanan.
Matud ni Eugenio P. Ibo, Jr., Chief Transportation Development Officer sa LTFRB-7, usa kini sa mga requirements nga ilang gisusi atol sa ilang terminal inspections aron maseguro ang kaluwasan sa mga pasahero ug mapadali ang pag-imbestigar sa mga insidente sa dalan.
Matud pa ni Ibo, dako og ikatabang ang maong mga device sa pagtino kon kinsa ang responsable kung adunay mahitabong aksidente nga nalambigit ang usa ka unit.
Dugang pa niya, dili kini basta dugang nga requirement lamang, kondili kabahin sa mga safety requirements nga kinahanglang tumanon sa mga operator nga sakop sa maong polisiya.
Lakip sa mga sakop niini ang mga modernized jeepney, PUVs ug UV Express, isip kabahin sa PUV modernization program.
Apan, giklaro ni Ibo nga walay apil sa pagpatuman niini sa mga karaang traditional jeepney units.
Samtang, gipahimangnoan usab ang mga operator sa pagsunod sa maong mga requirement tungod kay adunay katugbang nga silot ang paglapas niini.
Dugang pa ni Ibo, 5,000 pesos ang multa sa unang paglapas, 10,000 pesos sa ikaduhang paglapas, ug mahimong kanselahon ang Certificate of Public Convenience sa ikatulong paglapas.
Gipasiugda sa LTFRB-7 nga ang pagsunod sa mga safety requirements makatabang sa pagmonitor sa mga sakyanan ug sa paghatag og dugang impormasyon sa pagresolba sa mga insidente nga mahitabo panahon sa biyahe.
