Hugot nga gilimod sa kanhi Bangsamoro parliament member nga si Sultan Edrieza Nasser Rimbang ang mga pasangil nga nalambigit siya sa 521 ka kilo nga shabu nga nagkantidad og P3.5 bilyon ug nasakmit sa Laos.
Mitubag si Rimbang human sa mga pahayag sa Department of the Interior and Local Government (DILG) nga nag-ila kaniya isip gituohang financier ug utok sa plano nga ipasulod ang maong kontrabando sa Manila gamit ang usa ka giabangan nga eroplano.
Gikuwestiyon sa kanhi opisyal kung asa siya makakuha sa dakong kantidad sa kuwarta nga gikinahanglan alang sa maong ilegal nga operasyon.
Nanawagan usab siya og pormal nga imbestigasyon aron mapamatud-an ang kamatuoran ug malimpyohan ang iyang ngalan.
Gipasiugda ni Rimbang nga grabeng naapektuhan ang iyang pamilya, lakip na ang edukasyon sa iyang mga anak, tungod sa pagkaylap sa mga hulagway ug sa giingong sayop nga impormasyon bahin kaniya.
Samtang, ang iyang kampo ug legal nga tambag nag-andam na og mga lakang aron mapasakaan og tukmang kaso ang mga tawo nga, matod pa nila, nagpakaylap sa walay basehanang mga pasangil batok kaniya.
