Nagpahibalo ang Estados Unidos og dugang pondo alang sa kooperasyon sa seguridad uban sa Pilipinas aron mapadali ang modernisasyon sa Armed Forces of the Philippines (AFP).
Sumala sa US Department of War, gipahibalo ni US Defense Secretary Pete Hegseth ang maong dugang pondo atol sa ilang bilateral meeting ni Defense Secretary Gilberto Teodoro Jr. gahapon Miyerkules.
Ang maong inisyatibo nagtumong sa pagpalig-on sa mga kapabilidad sa militar sa Pilipinas ug pagpauswag sa koordinasyon sa mga pwersa sa duha ka nasod, ilabi na sulod sa tinawag nga First Island Chain.
Hinuon, wala gibutyag sa US Defense Department ang eksaktong kantidad sa maong dugang nga pondo.
Gihisgotan usab nila ni Hegseth ug Teodoro ang mga lakang aron mas mapalig-on ang relasyon sa depensa, lakip na ang pagpauswag sa ilang mga command and control systems aron mapadali ang koordinasyon ug pagbinayloay og impormasyon atol sa mga operasyon.
Samtang, giila sa duha ka lider ang mga nahimo nang kalamboan sa pagpatuman sa Enhanced Defense Cooperation Agreement (EDCA), lakip na ang mga proyekto sa imprastruktura ug mga pasilidad sa pagtipig sa mga nagkalain-laing dapit sa nasod.
Ang maong pahibalo gihimo dungan sa pagpahigayon sa ika-20 nga ASEAN Defense Ministers’ Meeting (ADMM) ug ika-13 nga ADMM-Plus sa Sugbo sa Oktubre 28 ug 29.
