Nag-awhag ang 20 ka senador kang President Ferdinand Marcos Jr. nga ideklarar ang state of calamity sa mga lugar nga posibleng grabeng maapektuhan sa hulga sa Super El Niño sa tibuok nasud.
Subay sa Republic Act No. 10121, ang maong deklarasyon magtugot sa dinaliang pagpatuman sa mga lakang sama sa pagtakda og price ceiling sa mga batakang panginahanglanon, pagmonitor sa presyo sa mga palaliton, ug pagpugong sa hoarding ug sobrang pagpataas sa presyo.
Pinaagi sa Proposed Senate Resolution No. 765, giawhag sa mga senador ang Presidente nga molihok dayon subay sa rekomendasyon sa National Disaster Risk Reduction and Management Council (NDRRMC), ilabina aron mapanalipdan ang sektor sa agrikultura ug uban pang apektadong komunidad.
Lakip usab sa gisugyot nga mga lakang ang paggahin og pondo alang sa rehabilitasyon sa mga pampublikong imprastraktura ug paghatag og walay interes nga pautang ngadto sa mga sektor nga grabeng maapektuhan.
Lakip sa mipirma sa resolusyon sila Senate President Win Gatchalian, Senate President Pro Tempore Tito Sotto, ug mga senador nga sila Kiko Pangilinan, Migz Zubiri, Bam Aquino, Risa Hontiveros, JV Ejercito, Lito Lapid, Joel Villanueva, Erwin Tulfo, Raffy Tulfo, Ping Lacson, Chiz Escudero, Alan Peter Cayetano, Pia Cayetano, Imee Marcos, Robin Padilla, Bong Go, Camille Villar ug Mark Villar.
