NEGROS ISLAND- Niabot na sa 30 ka lugar ang ashfall o abo sa pagbuto sa Kanlaon volcano sa Isla sa Negros basi sa datos sa Department of Environment and Natural Resources (DENR).
Sumala sa DENR- Environmental Management Bureau (EMB) Western Visayas, natala ang ashfall sa Negros Occidental partikular sa La Castellana, La Carlota City, Bago City, Murcia, Pontevedra, San Enrique, Hinigaran, Valladolid, Pulupandan ug Moises Padilla.
Apektado usab ang mga lugar sa Guimaras, partikular sa Nueva Valencia, Sibunag, San Lorenzo ug Jordan.
Ingon man sa Iloilo City, Pavia, Oton, Tigbauan, Igbaras, Guimbal, Miag-ao, San Joaquin ug 7 pa ka lugar sa Antique.
Kalabot niini, ang EMB Western Visayas nipasidaan sa mga apektadong residente nga ang exposure sa ashfall mahimong moresulta sa mga problema sa respiratoryo sama sa iritasyon sa mata, panit ug samad.
Matod niya kinahanglan nga limitahan una ang mga kalihokan sa gawas, ilabi na sa mga bata, tiguwang ug adunay mga problema sa respiratoryo.
Gitambagan usab ang mga apektadong residente nga magsul-ob og N95 mask ug goggles kung kinahanglan nga mogawas ug magsul-ob og taas nga manggas aron mapanalipdan ang panit.
