Mopasaka og affidavit alang sa non-bailable “human trafficking” nga kaso ang abogado nga si Elmer Galicia nga ninotaryo sa counter-affidavit sa gitaktak nga kanhi mayor sa Bamban, Tarlac nga si Alice Guo, aron pagmatuod nga nakigtagbo siya sa mayor.
Gipangita karon sa mga awtoridad si Guo human gikataho nga nibiya siya sa nasud niadtong Hulyo 17 bisan og ubos siya sa immigration lookout bulletin order.
Matod ni Bulacan Provincial Prosecutor Ramoncito Ocampo, uban ni Galicia nga miadto sa DOJ niadtong Martes aron pagklaro sa notarization sa counter-affidavit ni Guo, nakigtagbo si Galicia sa kanhi mayor sa San Jose Del Monte, Bulacan.
Dugang pa ni Ocampo, nga matod ni Galicia, nga niabot sa iyang buhatan ang gitaktak nga mayor sakay sa Toyota Land Cruiser pasado alas 7 sa gabii niadtong Agosto 14.
Siya ug si Alice Guo giingong nag-estorya sa gawas sa iyang opisina ug gipakita ni Guo ang iyang lisensya sa pagmaneho dayon ginotaryohan ni Galicia ang counter-affidavit nga gisumite sa DOJ sa mga abogado ni Guo niadtong Agosto 16 alang sa preliminary investigation.
Base sa jurisprudence, ang notary public kinahanglan nga dili monotaryo sa usa ka dokumento gawas lang kung ang mga tawo nga mipirma niini mao ang mga tawo nga nagpatuman niini ug personal nga miatubang kaniya aron pamatud-an ang sulod ug kamatuoran sa gipahayag sa dokumento.
Sa sayo pa, ang kampo ni Guo niingon nga misalig sila sa kaligdong ni Galicia ug nagtuo nga ania pa sa nasod ang kanhi mayor.
