CEBU CITY-Nihatag si Cebu City Acting Mayor Raymond Alvin N. Garcia og 48 ka oras nga deadline sa Cebu City Police Office (CCPO) sa pagtaho sa kalambuan sa imbestigasyon niini sa pagpanulis sa duha ka pawnshop sa Calderon St., Barangay Ermita gahapon Huwebes Agosto 8, 2024.
Sa pakighinabi sa Bombo Radyo-newsteam kang Acting Mayor Garcia, gitino niini nga dili lamang ang seguridad sa dakbayan ang alanganin, apan hasta ang pwesto sa OIC-City Director sa Cebu City Police Office nga si Police Colonel Antonietto Cañete.
Gi-angkon ni Garcia, nga nasagmuyo kini sa maong krimen nga nahitabo udtong tutok ug doul mismo sa kinadak-ang pampublikong merkado sa dakbayan diin nahimutang ang pipila ka mga police outpost.
Dugang pa niini, nga ang adunay usa ka police station sa dakbayan nahimutang pipila lang ka metros gikan sa panghitabong krimen.
Matud ni Garcia, nga kon mapakyas ang kapolisan sa pagsulbad sa kaso og molapas na ang deadline, hayan ikonsiderar niya pag-usab ang pag-endorso kang Col. Cañete isip bag-ong direktor sa kapolisan sa dakbayan.
Sumala sa inisyal nga imbestigasyon, kapin 14-milyones pesos ang balor sa mga alahas nga nakawkaw sa mga tulisan kinsa padayon pang gigukod sa hot pursuit operation sa kapulisan sa CCPO.
