Gihulipan sa komitiba sa Sangguniang Panlungsod sa dakbayan sa Mandaue si Acting Mayor Nerissa Soon-Ruiz ug duha sa konsehal atol sa sesyon niini niadtong adlaw sa Martes, Septiyembre 10, 2024.
Bisan tuod ang Acting Mayor niingon nga nasurprisa siya sa maong lakang nga iyang giangkon nga dili kini hingpit nga wala damha tungod sa iyang dual role isip acting vice mayor ug pagka-konsehal nga adunay gipangulohan nga komitiba.
Subay pa nga ang reassignment gihimo isip usa ka lakang aron maminusan ang kabug-at sa trabaho ni Soon-Ruiz.
Gihulipan niya ang komitiba sa kalawasan (Committee on Health) human mi-mosyon si Mandaue City SK Federation President Flueritz Gayle Jumao-as nga mipahimangno nga ang pagkatudlo niya karon isip acting vice mayor makapugong na kaniya sa pag-atiman sa uban niyang mga responsibilidad.
Dugang pa, si Soon-Ruiz nikanaog usab sa katungdanan isip President Pro Tempore sa maong konseho.
Ang duha sa iyang mga kaalyado mi-release usab sa ilang pagka-chairman sa Committee on Agriculture ug Committee on Energy nga sila si Konsehal Andreo “Anjong” Ouano-Icalina ug Konsehal Cesar Cabahug.
Sa ulahi gihatag ang chairmanship sa Committee on Health ngadto kang Konsehal Cynthia Cinco-Remedio samtang ang Committee on energy gi-assign kang ABC President Dante Borbajo.
Laing kaalyado sa administrasyon nga si Konsehal Editha Flores-Cabahug ang gihatagan sa pagka-chairman sa Committee on Agriculture, dugang sa iyang pagka chairman sa Committee on Human Rights.
Samtang si Konsehal Marie Immaline Cortes-Zafra, kinsa kasamtangang chairperson sa Committees on Budget and Finance and Tourism maoy gihinganlan nga bag-ong President Pro Tempore kinsa pag-umangkon kini ni Suspended Mandaue City Mayor Jonas Cortes.
Apan sa habig sa Acting Mayor, posibling “politically motivated” ang maong aksyon sa kauban sa konseho nga nasugoan lang ang SK Federation President sa kaalyado sa mayorya sa politika.
