CEBU CITY — Ipaubos sa state of calamity ang Brgy. Tipolo sa dakbayan sa Mandaue human miulbo ang dakong sunog sa Sitio Maharlika, Espina, ug Basubas Compound.
Matud ni Brgy. Councilor Eric Estrera nga nalakip sa ilang agenda sa gipahigayong emergency meeting mao ang pagpagawas og calamity fund aron mahatagan og hinabang ang mga apektadong residente.
Dugang pa ni Estrera nga daghang mga nasunugan ang nabalaka sa ilang sitwasyon ilabi na nga ang ilang kaugalingon lang maoy nasalbar.
Maong ni-awhag ang konsehal sa publiko nga mohatag og hinabang alang sa mga nasunugan sama lang sa pagkaon, mga sinina, gamit sa kusina, ug uban pang mga panginahanglanon.
Gi-evacuate una ang mga apektado sa Colegio dela Imaculada Concepcion, Tipolo Elementary School, ug ang karaang Cebu International Convention Center.
Natala sa Mandaue City Fire Department nga gibana-banang mokabat og P1.3-Million ang danyos sa maong sunog.
Samtang mihangyo si Acting City Mayor Carlo Fortuna nga mopahigayon og special session aron magamit ang calamity fund sa City Government isip hinabang sa mga residente.
“Given the magnitude of this calamity, the victims will need the support of the public for whatever assistance that can be extended to them,” sigon pa ni Fortuna.
Kasamtangang giimbestigaran sa kabumberuhan ang hinungdan sa maong sunog diin nangaugdaw ang halos 500 ka mga kabalayan ug misaka pa kini sa Task Force Bravo.
Hinuon walay natalang mga na-injured o nakalas atol sa maong sunog human kini na-fire out pasado alas-9 sa buntag.
