CEBU CITY — Gipaubos sa marine casualty investigation sa Philippine Coast Guard (PCG) VII ang pagtikya-ob sa usa ka cargo vessel sa lungsod sa San Fernando aron matino kung unsa ang hinungdan niini.
Basi sa pasiunang imbestigasyon, nagkarga og sinakong mga semento ang M/V Eva Mary Grace sa SEDC Port ug kalit kining mitikyaob sa dihang naigo kini og dakong bawod sa dagat.
Matud sa tigpamaba sa PCG-7 nga si Lieutenant Junior Grade Michael Encina nga daling miresponde ang Coast Guard sa Naga City ingon man ang Special Unit human mitikyaob ang maong cargo vessel.
Hinoon luwas ra ang 11 ka mga crew human nga natagaan dayon og atensyong medikal samtang nalandig sa tambalanan ang crane operator nga si Manuel Encarnacion human nakaangkon og samad sa iyang paa.
Dugang pa ni Encina nga gibutangan og oil spill boom ang palibot sa M/V Eva Mary Grace aron dili magkatag sa dagat ang diesel oil gikan makina niini.
Makig-alayon usab ang PCG-7 sa mga sakop sa Maritime Industry Authority (MARINA) alang sa gipalawman nilang imbestigasyon.
