Samdan ang usa ka 5-anyos nga batang lalaki human kini aksidenteng napusilan sa iyang ig-agaw sa Brgy. Cogon, sa lungsod sa Dumanjug, Cebu.
Giila ang biktimang si alyas Baby Boy, residente sa nahisgutang dapit, diin kaduwa niini ang iyang 5-anyos nga ig-agaw.
Matud ni Police Master Sergeant Ian Joseph Arapo sa Dumanjug PNP nga nakadawat sila og report gikan sa guard on duty sa tambalanan kalabot na sa kahimtang sa bata.
Sa ilang pasiunang imbestigasyon, nasayran nga nakapunit ang duha og usa ka pusil gikan sa ilang silingan.
Hilabihan na lang ang pagkakurat nga sa dihang nibuto ang giduwaan nilang armas, naigo si alyas Baby Boy sa iyang tuhod ug natapsingan kini sa iyang dalunggan.
Tungod sa kaping-it sa kasakit, naratol na lang ang ig-agaw sa biktima ug gidala kini dayon sa tambalanan.
Uwahi na lang, matud pa, sa dihang nasuta sa PNP nga usa ka caliber 38 revolver nga armas ang giduwa sa mga bata sa pagtuo nga usa ka toygun.
Gisuta pa sa otoridad kung kinsa ang tag-iya sa tinuod nga armas samtang nakagawas na sa tambalanan ang biktima human kini gitambalan sa attending physician.
