Nimando sa dinaliang pagtangtang sa serbisyo si Bureau of Immigration (BI) Commissioner Joel Viado sa mga personahe sa ilang ahensya human sa pag-eskapo sa usa ka high-profile nga pugante nga usa ka Korean national.
Base sa bag-ong CCTV footage ug testimonial evidence nga nahipos, posibleng adunay panagkunsabo sa maong panghitabo.
Sa usa ka pamahayag, si Viado niingon nga dili kini yanong pagpabaya tungod kay matod niya nakuhaan sa camera ang mga lihok ug interaksyon nga nagpakita og panagkunsabo.
Gawas niini, matod niya aduna usab silay nahipos nga dugang testimonial evidence nga makapalig-on pa sa ilang kaso batok sa mga personahe nga nalambigit.
Kasamtangang nagpadayon pa ang imbestigasyon nga adunay lig-on nga ebidensya nga magsuporta sa mga kriminal nga kaso batok sa mga responsable sa insidente.
Samtang, gipasaka na ang mga reklamong kriminal batok sa mga BI personnels sa Department of Justice.
Ang kadagkoan sa BI nisaad nga dili mopahuway ang maong ahensya hangtod nga silotan ug prisohon ang tanang responsable aron dili sila mahimong sundon sa umaabot panahon.
Sa sayo pa, ang Korean fugitive nga si “Na Ik-hyeon” nakaikyas sa dihang nitambong siya sa hearing sa iyang estafa case sa QC prosecutor’s office niadtong Marso 4.
