Gilugwayan sa Bureau of Internal Revenue (BIR) ang mga deadline sa pag-file sa tax returns, pagbayad sa buhis, ug pagsumiter sa mga gikinahanglang dokumento sa mga lugar nga apektado sa tropical cyclones Crising, Dante, ug Emong, inubanan sa gipakusog nga hanging habagat.
Sa usa ka pahayag kaniadtong Biyernes, Hulyo 25, ang BIR miingon nga ang relief magamit sa mga magbubuhis sa Metro Manila ug mga probinsya sa Ilocos Norte, Ilocos Sur, La Union, Pangasinan, Abra, Apayao, Benguet, Ifugao, Kalinga, Mountain Province, ug Cagayan, nga bag-o lang naapektuhan sa mga weather systems.
Sumala pa ni BIR Commissioner Romeo Lumagui Jr. nga nasabtan ra sa ahensya ang gisagubang sa mga magbubuhis ug giawhag niini nga unahan ilang kaluwasan tungod gi-extend nila nag deadline sa Hulyo 31.
Ang extension magamit usab sa mga magbubuhis sa Cagayan, Nueva Vizcaya, Bataan, Bulacan, Nueva Ecija, Pampanga, Tarlac, Zambales, Marinduque, Oriental and Occidental Mindoro, Palawan, Romblon, Albay, Camarines Sur, Catanduanes, Masbate, Sorsogon, Aklan, Antique, Capiz, Guimaras, Iloilo, ug Negros Occidental.
Dugang pa nga aron mapagaan ang palas-anon tungod sa bag-o nga kahimtang sa panahon, ang tanang magbubuhis ug BIR personnel ubos sa apektadong Revenue District Offices ug Authorized Agent Banks gihatagan ug taas nga panahon sa pagtuman sa ilang mga obligasyon sa buhis.
Sa higayong ang bag-ong deadline matakdo sa usa ka holiday o non-working day, ang sunod nga adlaw isipon nga maoy takdang petsa.
