Nipasidaan si Britain Prime Minister Keir Starmer nga ilhon sa ilang nasud ang Palestinian isip estado karong buwan sa Setyembre, kung dili magpahigayon ang Israel og mga lakang nga tuldukan ang krisis sa Gaza lakip na niini ang pagpahunong sa away, paghatag og tabang, ingon man ang paglikay sa pag-angkon sa West Bank.
Ang pasidaan nunot sa usa ka taho gikan sa Integrated Food Security Phase Classification (IPC) nga nag-ingon nga ang sitwasyon sa Gaza niabot sa lebel sa kagutom, uban sa mga nangamatay tungod sa kagutom ug pagsaka sa malnutrisyon.
Gani, gikondenar kini ni Israeli Prime Minister Benjamin Netanyahu ug gitaho nga ang pag-ila sa mga Palestinian mahimong ‘reward’ sa mga gihimo sa terorismong Hamas.
Samtang, ang Presidente sa US nga si Donald Trump miingon nga dili siya pabor sa pagganti sa Hamas, apan wala niya gisupak ang desisyon sa Britain.
Gitawag usab ni Palestinian President Mahmoud Abbas ang lakang ni Starmer nga usa ka “maisog nga lakang,” kung kini magpadayon.
