LAPU-LAPU CITY-Niluwat Og Cease and Desist Order ang kagamhanang dakbayan sa Lapu-Lapu batok sa Tourist Garden Hotel nga nahimutang sa Brgy. Agus, sa maong dakbayan mahitungod sa giingong illegal nga operasyon sa POGO nga gi-raid sa mga awtoridad niadtong Agosto 31, 2024.
Pinirmahan ang maong kamanduan ni Lapu-Lapu City Mayor Junard “Ahong” Chan nga personal nga gironda sa mayor ang pag-serve sa nahisgutang patigayon.
Matod pa sa Mayor nga siya mismo ang makalaban sa mga nagpadagan ug illegal nga operasyon sa pasugalan ilabi na sa ginadili nga POGO Hub.
Midugang ang mayor nga gusto niya nga ihunong dayon sa hotel ang operasyon niini human nadiskubrehan ang usa ka operasyon sa ilegal nga POGO hub ug sa mga naluwas nga mga langyaw.
Nanghangyo sab ang mayor nga i-report dayon ang mga kadudahang lihok sa mga silingan aron kini maronda sa kapulisan og masugpo ang posibilidad sa illegal nga kalihokan sa dakbayan.
