Gi-awhag ni Cebu Archbishop Most Rev. Alberto S. Uy, D.D. ang mga deboto nga magpabiling konektado sa Diyos, nga nagpahinumdom nga ang kinabuhi nga nagkahiusa sa Iyang gugma dili gayud mahaw-ang ug dili biyaan sa kahaw-ang.
Sa iyang homiliya sa Pontifical Mass alas-6 sa buntag isip kabahin sa pagselebrar sa Fiesta Señor 2026, miingon ang arsobispo nga ang matag gutlo sa kinabuhi, bisan pa man puno sa pagsulay, kaluya, o hilom nga paghulat, mahimo nga luna sa presensya sa Diyos kon magpabilin ang pagduol ug pagtuo Kaniya.
Sumala ni Archbishop Uy, ang debosyon sa Señor Santo Niño usa ka pahinumdom sa gugma sa Diyos nga naghiusa sa katawhan. Ang mga deboto, matod pa niya, nagkahiusa dili tungod sa kahimtangan, kondili tungod sa usa ka pagtuo nga nagtigom ug nagpahinumdom nga di gayud sila mag-inusara diha sa Dios.
Gidagsa sa libo-libong mga deboto gikan sa nagkadaiyang lugar sa nasud ang Pontifical Mass, isip kabahin sa tuigan nga pagsaulog sa kapistahan sa Señor Santo Niño, ang patron sa Sugbo.
