Gihangop ni Cebu City Mayor Nestor Archival ang sugyot alang sa lifestyle check sa mga opisyal sa gobyerno, nga andam niyang ablihan ang iyang mga record sa pagsusi sugod sa iyang Statement of Assets, Liabilities, and Net Worth (SALN).
Kini ang nahimong pamahayag sa mayor human nisang-at si Konsehal Sisinio Andales og mosyon atubangan sa City Council nga nanawagan og institutionalized lifestyle checks alang sa mga pinili ug gitudlo nga opisyal sa dakbayan sa Sugbo.
Gihimug-atan ni Andales sa iyang privilege speech atol sa sesyon sa City Council niadtong Setyembre 10 nga ang maong lakang dili witch hunt o politically motivated, kondili usa ka lakang aron mahibalik ang pagsalig sa katawhan sa gobyerno.
Matod niya, ang dakbayan sa Sugbo, sama sa ubang mga local government units (LGUs), dili gawasnon sa giingong mga kahiwian sa paggasto sa publiko, tungod kay mas kusog karon ang panginahanglan alang sa transparency.
Hinungdan nga aron ma-institutionalize ang proseso, gisugyot ni Andales ang paghimo og Local Integrity and Lifestyle Audit Task Force.
Diin ang grupo gilangkuban sa Internal Audit Service Office, Human Resource and Development Office, ug City Legal Office, nga adunay koordinasyon gikan sa nasudnong mga ahensya sa pagdumala, sama sa Office of the Ombudsman, Commission on Audit (COA), ug Civil Service Commission (CSC).
