Gipaila na ni Cebu City Mayor Nestor Archival ang bag-ong Director sa Cebu City Police Office (CCPO.
Ang bag-ong mangulo sa CCPO mao si PCol. George Ylanan, diin suportado usab sa pangu sa Sugbo ang mamahimong liderato niini, ingun man ang pagtabang sa mga sakop sa Kapulisan kabahin na sa pagrekober sa mga kadaot nga gibilin sa mga bag-o lang nga kalamidad.
Gihimug-atan usab ni Archival nga importansya sa mamahimong koordinasyon sa matag Local Government Unit (LGU) ngadto na sa mga sakop sa Kapulisan, aron mamintinar ang peace, safety and public order.
Subay niini, si PCol. Ylanan kinsa lumad Sugbuanon gayud, diin iyahang nasaysay nga gipakato ug nagdako sa Brgy. Labangon ning Dakbayan sa Sugbo, ug ni gradwar sa University of San Carlos, dayun mitungha sa Police Academy ug nakahuman niadtong 2002.
Nunot sa bag-ong gidawat nga katungdanan niini, nipasalig si Ylanan nga iyahang ipabilin ug imintinar nga magpabiling luwas ug desiplinadong dakbayan ang Sugbo.
Busa, atol na sa pakighinabi ni Archival, iyang gipaambit nga nalipay sila nga si Ylanan ang bag-ong napili nga City Director sa CCPO.
Dugang saysay ni Archival mao ang tumong sa maong personahe mao ang “to prevent and solve the crimes,” nga nagpasabot, sa dili pa mahitabo ang usa ka krimen, napugngan na kini.
Gani, gipaambit usab ni Archival nga atol sa panagstoryahanay nila, napunting ang mga gikinahanglanon niini diin nag una na ang “mobility.” Diin, aduna nay 80 ka mga mobile vehicle nga gitugyan sa syudad sa Sugbo kaniadto, apan karon 40 nalang ang nahabilin. Busa, nihangyo kini, ug dali ra usab nga nisanong si Archival.
Lakip sa natataw mao ang tactical motorcycle team diin karon wala nay nagpabilin motorcycle, busa subling nagmando si Archival ngadto na sa Committee on Police kabahin na sa pagsusi-susi sa mga sakyanan nga gikinahanglan ug angay nga paliton.
Sa nahimong bahin usab ni Ylanan atol gihapon sa iyang courtesy visit kang Mayor Archival, gihatgan niini og gibug-aton ang mas lig-on nga pagpugong sa krimen, mas hugot nga police visibility, ug gibag-o nga mga paningkamot aron mabalik ang pagsalig sa publiko samtang magsugod siya sa iyang pagpangulo sa Dakbayan sa Sugbo.
