CEBU – Mokabat sa 8,407 ang bag-ong na-‘diagnosed’ ug human immunodeficiency virus (HIV) cases sukad niadtong May 2022 diin mao’y naghimo sa Central Visayas nga ika-upat sa 17 ka mga rehiyon sa Pilipinas nga adunay pinakadaghang kaso sa HIV.
Ang maong mga kaso sa rehiyon kay 8 porsyento sa kinatibuk-ang 100,298 sukad niadtong May 2022, kini matud pa ni Dr. Ilya Abellanosa Tac-an, ang pangulo sa Social Hygiene Clinic sa Cebu City Health Office.
Nakatala ang Cebu City ug 4,993 ka mga indibidwal nga adunay HIV, diin 59 porsyento kini sa kinatibuk-ang kaso sa rehiyon.
Sagad niini kay gikan sa age group nga 25 ngadto sa 34 anyos nga mikabat sa 45 porsyento, gisundan sa 15 ngadto sa 24 anyos nga mikabat sa 27 porsyento; 35 ngadto sa 49 anyos nga mikabat sa 24 porsyento; ug 50 anyos pataas nga mikabat sa 4 porsyento.
Nakita nga ang pag-share ug mga infected nga dagum o syringes ang nagpabilin nga numero unong hinungdan sa transmission o pagpasa sa HIV sa dakbayan sa Sugbo, diin 42 porsyento niini sa kinatibuk-ang 4,993 ka mga kaso.
As of March 2022, mikabat sa 2,968 ka mga tawo nga adunay HIV sa dakbayan sa Sugbo ang nakapa-enroll na sa antiretroviral therapy.
