CEBU CITY-Bug-os ang pagpangandam sa Cebu City Police Office (CCPO) sa pag-abot ni President Ferdinand Marcos Jr. kinsang usa sa mga mutambong sa Asia-Pacific Economic Cooperation (APEC) Business Advisory meeting nga gisugdan gahapon, Hulyo 27, hangtud ugmang adlawa.
Kini ang gitino ni Police Colonel Ireneo Dalogdog, ang City Director sa Cebu City police Office, kinsa mipahimangno sa mga hepe sa nagkadaiyang police stations nga magbuhat og random checkpoints sa ilahang dapit aron malikayan ang bisan unsang matang sa krimen.
Dugang pa sa opisyal, nga susihon usab sa mga kapulisan ang mga sakyanan nga paingon sa Cebu City sa gihisgutang random checkpoints.
Samtang, sa pikas bahin nipsalig si Police Lieutenant Colonel Gerard Ace Pelare, ang tigpamaba ni Police Regional Office Central Visayas director Police Brigadier General Anthony Aberin, nga ang tibuok regional police force mohatag og hugot nga seguridad sa adlaw sa kalihokan.
Nasayran, nga ang gihisgutang panagkatigum kay aron tukion ang mga dagkong hagit sa ekonomiya ingon man maghimo og mga lakang alang sa malungtaron nga pagtubo sa ekonomiya ug pagtinabangay.
