CENTRAL VISAYAS- Gipangulohan ni Cebu Governor Pamela Baricuatro ang mainitong pagsugat sa mga delegado sa Philippine Economic Briefing (PEB) nga gipahigayon sa usa ka hotel dinhi sa dakbayan.
Apil sa mga nangulo sa kalihokan mao sila Finance Secretary Ralph Recto, Cebu City Mayor Nestor Archival, ug uban pang mga representante gikan sa nasyonal nga ahensya ug pribadong sektor.
Ang maong briefing usa ka flagship initiative sa DOF, DBM, ug BSP, nga nagtumong sa paghatag og update kabahin sa economic performance, reform agenda, ug investment opportunities sa tibuok nasud.
Gipadayag ni Secretary Recto nga ang Central Visayas ang pinakapaspas motubo nga rehiyon sa nasud, nga adunay 7.3% nga economic growth sa tuig 2023 hangtod 2024, labing taas sa 17 ka rehiyon.
Giila niya ang rehiyon, nga pinangulohan sa Sugbo, nga usa ka “national powerhouse” tungod sa kusog nga performance sa teknolohiya, turismo, ug connectivity.
Ang datos sa pagtubo naglakip pa sa Negros Oriental ug Siquijor, nga kauban pa sa Central Visayas hangtod sa pagtukod sa Negros Island Region (NIR) niadtong Hunyo 2024.
Sa laing bahin, gipangutana si Secretary Recto kon makaapekto ba sa ekonomiya sa nasod ang nagpadayon nga “political unrest.”
Matod niya, nga nanghinaot kini nga dili lamang maapektohan, gipasabot niya nga ang kalinaw ug political stability maoy importante nga pundasyon sa mas lig-on nga ekonomiya, ug nagpadayon ang paningkamot sa national government aron malikayan ang mas dako nga epekto niini sa nasudnong kalamboan.
