Subling gipasidan-an sa China ang Pilipinas kabahin sa pakig-alyansa niini sa Estados Unidos taliwala sa bag-ong lakang sa duha ka nasud aron pauswagon pa ang kooperasyon militar dungan sa pagbisita sa nasud ni US Defense chief Pete Hegseth.
Giakusahan sa higanteng nasud ang PH ug US nga nagpasamot sa tensyon sa rehiyon.
Gisaway usab sa tigpamaba sa Chinese Foreign Ministry nga si Guo Jiakun ang bag-o lang nga pamahayag ni Hegseth, kinsa sa pagkakaron anaa sa 2 ka adlaw nga pagbisita sa nasud, ug nanawagan sa Pilipinas nga hunongon ang paghimo sa gitawag niyang ‘instability’.
Matod niya nga bisan unsa pa ang kooperasyon sa US ug PH, dili kini angay nga target o gub-on ang bisan unsang ikatulo nga partido, inay likayan ang pagsabwag sa mga akusasyon sa tinumotumo nga mga hulga aron mapukaw ang komprontasyon sa kaalyado niini ug modako ang tensyon sa rehiyon.
Katarungan sa Chinese official nga ang kagawasan sa pag-navigate ug overflight wala’y problema sa gilalisan nga kadagatan.
Gipasanginlan hinuon niya nga ang Amerika nga maoy usa sa mga giingong nangsulsol sa provocation sa mga kaalyado niini nga gitawag sa China og hulga ug niangkon nga ang kagawasan sa paglawig sa gi-awayan nga rehiyon maoy gikabalak-an.
Gisaway usab niini ang US sa pagpadala og dugang nga military resource sa rehiyon, nga giingon nga makadaot sa kalinaw ug kalig-on.
