CEBU – Gihulagway sa Commission on Human Rights (CHR-7) nga usa ka extra legal killing ang nahitabo sa duha ka tao nga gisunog nga nakaplagan sa lungsod sa Tuburan, sa lalawigan sa Sugbo.
Matud sa regional director nga si Atty. Arvin Udron nga usa kini ka grabe nga matang sa pagpang-abuso kung diin ang mga tao sa kasamtangan wala nay pakabana sa katungod sa laing tao nga mabuhi.
Subling gipasabot ni Udron nga ang kinabuhi dili hinatag sa gobyerno apan naangkon kini sa usa ka tao sa natural nga paagi hayan walay ni bisan kinsa nga mukutlo niini.
Gitino usab ni Udron nga kung naay sama nga panghitabo niini ug masayran nga yanong tao lamang ug wala sa posisyon sa gobyerno, ang pulis gyud ang mu-imbestigar niini.
Gitataw ni Udron nga sayop nga ang mga tao sila ang pangitaon kung naay patay nga mahitabo.
Hinoon, gi-angkon ni Udron nga musulod usab sila sa imbestigasyon ug dako nga hagit kini nila sanglit wala pa nahuman ang imbestigasyon, naa na usab patay nga nahitabo.
Dugang pa niini, kung ugaling mailhan na ang mga patay nga nakaplagan sa Tuburan,ila kining imbestigaran apan kung dili mailhan, muhatag sila og financial assistance.
Samtang anaa sa PNP Crime Laboratory ang patay’ng lawas sa mga biktima, kinsang gisunog sa bakante nga luna sa Tuburan, aron ipaubos sa DNA testing.
Matud ni Police Staff Sergeant Joremar Herbuena nga adunay nagpailang inahan sa usa sa mga biktima nga nagagikan pa sa Brgy. Mambaling, sa dakbayan sa Sugbo.
Base sa pagpakisayud ni Herbuena, nga nawala ang anak sa nagpailang inahan niadto pang adlaw sa Dominggo.
Gikuha og apil sa mga imbestigador ang DNA sample sa nagpailang inahan aron makumpirmar ang identity sa mga biktima.
Gikatakdang palawman pa sa PNP ang imbestigasyon sa pagkamatay sa 2 kung aduna nay identity base sa resulta gikan sa nakuha nga DNA samples. (FDP/GN)
