Nimando ang Department of Agriculture sa pagpatuman sa temporaryong pagdili sa importasyon sa mga poultry products gikan sa upat ka estado sa U.S. tungod sa outbreak sa bird flu.
Kini nga mga lugar naglakip sa Illinois, Minnesota, Ohio, ug Wisconsin sa Estados Unidos.
Basi sa notice sa ahensya nga gipirmahan ni Agriculture Secretary Francisco P. Tiu Laurel Jr., gimanduan niini ang Bureau of Animal Industry nga hunongon na ang pag-isyu og sanitary ug phytosanitary import clearances.
Partikular sa mga karne sa manok, piso, itlog, ug semilya gikan sa nahisgutang mga apektadong lugar sa nasod.
Ang DA nagpagawas sa mando human ang US Animal and Plant Health Inspection Service nakamatikod sa pagkaylap sa H5N1 high pathogenicity avian influenza sa upat ka estado sa U.S.
Samtang, giklaro sa ahensya nga gitugotan nila ang mga kargamento gikan sa US nga gipadala ug nadawat sa pantalan sa wala pa makumpirmar ang outbreak sa nasangpit nga nasud.
