UNITED STATES-Magtagbo alang sa debate sa pagkapresidente sa umaabot Septyembre 10 si kanhi US President Donald Trump ug current US Vice President nga si Kamala Harris.
Kini human ang news division sa US broadcasting company nga ABC News mikompirmar sa ilang social media account nga sila maoy mo-host sa unang debate tali ni Trump ug Harris.
Niadtong Huwebes, ang kandidato sa Republicans nga si Trump una nga nagsulti sa iyang press conference sa Mar-A-Lago, Palm Beach, Florida nga bukas siya nga makigdebate sa daghang higayon sa iyang kaatbang sa eleksyon nga si VP Harris sa Democratic Party, sa wala pa ang piniliay sa Nobyembre alang sa sunod nga Presidente sa America.
Sa habig ni VP Harris, gikompirmar usab niini nga motambong siya sa debate niini nga network samtang anaa sa usa ka kalihokan sa Michigan niadtong Huwebes ug abli usab sa pagtambong sa lain pang mga debate.
Kahinumdoman, nga ang ikaduhang debate tali ni Trump ug US President Joe Biden gikatakda unta karong Septiyembre 10 apan ni-withdraw siya sa presidential race human sa iyang dili maayong performance sa debate batok ni Trump niadtong Hunyo nga miresulta sa panawagan sa pipila ka Democrats sa pag-atras.
Naghatag kini og dalan alang sa iyang kauban nga si VP Harris, nga mopuli kaniya ug mahimong nominado sa Democratic party.
