CENTRAL VISAYAS-Nagsugod na sa ilahang payout ang Department of Social Welfare and Development, pinaagi sa Sustainable Livelihood Program, ngadto sa dul-an sa 2,000 ka mga sari-sari store owners sa Central Visayas nga adunay katungod nga makadawat sa P15,000 nga cash assistance.
Matud pa sa DTI-Cebu Province Consumer Protection Division, nga dinhi sa Sugbo nagsugod ang pagbayad sa unom ka managlahing lugar.
Kini nahimutang sa mga lungsod sa Pinamungajan, Moalboal, Balamban ug Daanbantayan ug sa mga dakbayan sa Mandaue ug Carcar.
Dugang pa, nga ang DTI maoy nag-ila sa mga benepisyaryo ug nagpasa niini nga listahan ngadto sa DSWD alang sa pagbayad.
Sa pikas bahin gibutyag ni DSWD-7 information officer Leah Quintana nga adunay kinatibuk-ang 1,986 ka benepisyaryo sa Central Visayas.
Sa maong mga numero, 1,103 ang naa sa Sugbo; 434 ka benepisyaryo sa Bohol; 405 ka benepisyaryo sa Negros Oriental; ug 44 sa Siquijor.
Apektado ang cash assistance sa mga tag-iya sa sari-sari store sa pagpatuman sa mandated price ceiling sa bugas nga nalatid ubos sa Executive Order No. 39 o nailhan nga Imposition of Mandated Price Ceilings on Rice nga miepekto niadtong Septiyembre 5, 2023.
Kahinumduman, gimanduan ni Presidente Ferdinand Marcos, Jr. ang DSWD sa paghatag og cash assistance sa mga gagmay nga rice retailers nga apektado sa pagpatuman sa gimando nga price ceiling sa regular ug well-milled nga bugas sa tibuok nasud.
