Gipaniguro sa Department of Health (DOH) nga adunay igong suplay sa libreng tambal alang sa Human immunodeficiency virus (HIV) ug testing kits.
Kini ang pasalig ni Health Secretary Ted Herbosa human girekomendar sa departamento ang pagdeklarar sa HIV isip national health emergency human ang Pilipinas nanguna sa pinakataas nga ihap sa bag-ong HIV cases sa Western Pacific Region.
Matod sa kalihim, sa iyang pagbisita sa ospital sa San Lazaro, usa ka dakong treatment hub nga gipadagan sa gobyerno alang sa “people living with HIV” (PLHIV), diin kompleto na ang ilang suplay sa antiretroviral drugs.
Dugang pa niini nga ang usa ka pasyente gihatagan na karon og tulo ka buwan nga suplay ug subling gisuplayan sa ARV treatment matag tulo ka bulan.
Gipasabot usab sa kadagkoan sa DOH nga libre ang mga tambal nga gibayran sa Philippine Health Insurance Corporation (PhilHealth).
Ingon man nga ang HIV self-test kits mahimong mapalit sa mga botika sa nasud. Hinuon, giklaro ni Sec. Herbosa nga nagkinahanglan pa og confirmatory test ang mga magpa-HIV test sa treatment hubs.
