METRO MANILA-Gipasalig sa Department of Health nga ang doxycycline nga gigamit sa pagtambal sa leptospirosis, mapalit na sa merkado ug mga health centers, kini tungod sa pagsaka sa ihap sa mga pasyente nga adunay kaso sa maong bacterial infection nunot sa kaylap nga pagbaha sa Luzon niadtong milabay’ng buwan.
Apan bisan pa niini, gipasabot ni DOH spokesperson Assistant Secretary Albert Domingo nga kinahanglan gihapon nga mokonsulta sa doktor sa dili pa mogamit sa maong tambal, kini tungod kay giingong dili kini magamit sa mga mabdos ug mga bata nga ubos sa 12 anyos ug gawas niini, nagdepende usab kini sa pisikal nga kahimtang sa usa ka indibidwal.
Ang nasangpit nga ahensya nagwagtang sa kahadlok sa publiko ug giingon nga kini magamit og libre sa mga sentro sa panglawas sa publiko.
Matod niya, bisan og nahurot na ang suplay sa doxycycline sa pipila ka rehiyon, tunga sa milyon ka kapsula ang gikatakdang i-release sa ahensya.
Nunot niini, gipasalig sa DOH sa publiko nga makaya sa health system sa nasud ang nagkataas nga kaso sa leptospirosis.
