Giklaro sa Department of Trade and Industry (DTI) nga walay price freeze nga gipatuman karon bisan pa sa deklarasyon sa state of national energy emergency sa nasud.
Sa usa ka pahayag, ang ahensya miingon nga ang suplay ug presyo sa mga batakang palaliton nagpabilin nga lig-on.
Kini human sa pag-isyu sa Executive Order (EO) No. 110, nga nagtumong sa pagpanalipod sa lokal nga suplay sa lana taliwala sa tensyon sa Middle East Region.
Sa samang han-ay, gi-activate ang Unified Package for Livelihoods, Industry, Food and Transport (UPLIFT) Program, nga maghatag og targeted subsidies para sa sektor sa transportasyon ug agrikultura.
Sumala sa DTI, ang gobyerno nihimo na og mga lakang sa inflationary pressures nga mahimong hinungdan sa pagpatuman sa price freeze pinaagi sa pagpabilin nga lig-on ang presyo sa mga produkto nga gideliver.
Gawas niini, ang ahensya nakigkita sa pribadong sektor, lakip ang 21 ka dagkong tiggama sa mga importanteng produkto lakip ang de-lata nga sardinas, pan, bottled water, instant noodles ug kape, kinsa misaad nga ipadayon ang ilang kasamtangang presyo sa sunod nga 30 ka adlaw o hangtod sa Abril 16 o 60 ka adlaw o hangtod sa Mayo 16.
Gipasalig usab sa DTI nga ang lebel sa imbentaryo sa mga importanteng produkto magpabilin nga igo base sa pagmonitor sa presyo ug suplay, busa walay kakulangon nga magpasabot og artipisyal nga pagsaka sa presyo.
