Gihingusgan sa Department of Trade and Industry – Fair Trade Enforcement Bureau ang ilang pagbantay sa pagpamaligya og ilegal nga pabuto isip pagpangandam sa pagsugat sa Bag-ong Tuig.
Matod ni Fair Trade Enforcement Bureau Director Gino Mallari, mahimo silang mo-issue og cease and desist orders alang sa mga manufacturers ug ingon man nag-implementar na usab og espesyal nga balaod bahin sa kriminal nga aspeto sa mga kalapasan ang Philippine National Police (PNP).
Ang opisyal mihimo sa maong pamahayag isip tubag sa mga apela sa legal nga mga tiggama og pabuto alang sa mas estrikto nga pagpatuman batok sa pagbaligya sa mga produkto nga dili sertipikado nga matod nila nakaapekto sa ilang panginabuhian.
Gipaniguro sa opisyal nga padayon sila nga nakig-alayon sa PNP, partikular na sa paghipos ug pagpaambit sa impormasyon kung asa makit-an ang mga produkto nga dili sertipikado.
Nakigtambayayong usab ang DTI sa mga lokal nga kagamhanan sa pagpatuman sa mga ordinansa ug pagtudlo og mga lugar alang sa pagpasundayag ug pagbaligya sa legal nga mga pabuto.
