Gipakatap ang dugang nga elite Army forces sa Bangsamoro Autonomous Region in Muslim Mindanao (BARMM) aron masiguro ang malinawon nga pagpahigayon sa nasudnon ug lokal nga eleksyon sa rehiyon karong Lunes, Mayo 12, 2025.
Sa pamahayag niadtong Sabado, si Army 6th Infantry Division (6ID) Major Gen Donald Gumiran mitaho nga usa ka contingent gikan sa 53rd Division Reconnaissance Company (53rd DRC) ang niabot kagahapon sa Tactical Operations Group headquarters sakay sa PH Air Force C-130 aircraft.
Matod niya gipadala ang mga elite troops aron masiguro ang luwas, malinawon, hapsay, limpyo ug kasaligan nga eleksyon.
Matod niya nga suportado usab nila ang Commission on Elections (Comelec) ug ubang ahensya sa pagpalig-on sa demokratikong integridad sa piniliay.
Ang 53rd Division Reconnaissance Company gilangkuban sa 500 ka mga opisyal nga mosuporta sa 90th Infantry Battalion sa mga lungsod sa North Cotabato ug pipila ka bahin sa Special Geographic Area sa BARMM nga gitala sa Comelec isip hotspot areas.
Sa pagkakaron, moabot na sa 5,000 ka military personnel ang gipakatap sa Army 6th Infantry Division’s area of operations aron makatabang sa pagsiguro sa hapsay nga eleksyon.
